Presidenti serb Boris Tadiç do të diskutojë sot në Bruksel me përfaqësuesen e lartë të BE-së për politikë të jashtme dhe siguri Catherine Ashton.

Në këtë takim pritet të qartësohet nëse rezoluta për Kosovën do të ndryshojë apo jo nëpërmjet një kompromisi të arritur mes Beogradit dhe Brukselit.

Agjencia e lajmeve serbe Tanjug njofton se bisedimet do të jenë një mundësi, për të gjetur një kompromis që nuk do të kalonte të ashtuquajturën “Linjë të kuqe” të Beogradit për njohjen e pavarësisë së Kosovës, por edhe që do të kënaqte Fuqitë e Mëdha gjithashtu.

Presidenti serb Tadiç, ka përsëritur më herët gatishmërinë e Serbisë për të bashkëpunuar me Bashkimin Evropian për gjetjen e një kompromisi, por gjithashtu ka theksuar se Serbia nuk do të pranojë një dokument që është i dëmshëm për interesat kombëtare të vendit të tij.

Vendet që e kanë njohur pavarësinë e Kosovës, kanë kundërshtime në tekstin e rezolutës për Kosovën në të cilën Serbia ia ka dërguar AP-së së OKB-së dhe e cila do të diskutohet më 9 shtator.

< Paraprake		Pasuese >