Shefi i diplomacisë sllovake, Mikulash Gjurinda, deklaroi të premten në Koshice se nuk sheh asnjë arsye që vendi i tij të ndryshojë qëndrimin për njohjen e Kosovës.

Deklarata e tij vjen pas thirrjes së shefit të diplomacisë gjermane Gudio Vestervele drejtuar pesë vendeve anëtare të BE-së të cilat nuk e kanë njohur ende Kosovën, që ta bëjnë një gjë të tillë.

“Kuptojmë interesin e Kosovës, por shumë seriozisht marrim parasysh edhe interesat e Beogradit”, tha Gjurinda.

Ministri sllovak theksoi se nuk është në interesin e Evropës që kontestet territoriale të zgjidhen përmes, siç u shpreh ai, secesioneve të njëanshme të grupeve të caktuara etnike.

Sipas tij, Gjykata Ndërkombëtare e Drejtësisë nuk ka zgjidhur asgjë dhe as që është marrë me thelbin e kësaj çështjeje.

Sllovakia është njëra nga pesë vendet anëtare të BE-së që ende nuk e kanë pranuar realitetin e ri të krijuar në Kosovë.
 

< Paraprake		Pasuese >