Shteti ka falimentuar institucionalisht, kushtetuta është thyer e fyer, nga Garda e Car Llazarit. Kështu vlerësojnë deputetët e opozitës, në debatin e sotëm në Kuvend.

Sipas tyre, hyrja e dhunshme e mbi 40 pjesëtarëve të këtij formacioni radikal, pa respektuar forcat kosovare të rendit, paraqet një bankrot institucional.

Deputetët e AAK-së, AKR-së dhe LDD-së thanë se hyrja në pikë të ditës e këtyre personave, sqaron se sa kontroll ka qeveria në 1/3 e territorit të saj në veri. Përgjigja e ekzekutivit ishte e menjëhershme.

Kryeministri Hashim Thaçi, pranoi se gjendja në veri nuk është e mirë por ka siguruar se po punohet për të bërë ndryshime në këtë pjesë. Ai ka përsëritur që kjo është qeveria e parë që ka bërë investime në veri, dhe ka është angazhuar për të luftuar korrupsionin dhe shpërbërjen e strukturave paralele.

Ndonëse polemizohej për Gardën e Car Llazarit dhe është pyetur për çështje të tjera, kryeministri Thaçi ka vazhduar të përmendë sukseset e arritura nga qeveria e tij si Aeroportin dhe Autstradën.
 
E dikush mendon se faji është i policisë e jo politikës, pse dështoi siguria në kufirin verior me Serbinë, në Jarinje apo portën 1, dhe u futën dhunshëm pjesëtarët e Gardës së Car Llazarit.

Ministri i Punëve të Brendshme Bajram Rexhepi, sipas medieve, ka kritikuar pjesëtarët serbë të policisë së Kosovës, të cilët nuk e kanë kryer detyrën me përgjegjësi në pikën kufitare në veri.

Ndërkaq, zëdhënësi i policisë, Besim Hoti tha se janë ngritur aktpadi ndaj 24 personave për pengim të personave zyrtar në kryerjen e detyrës. Të njëjtit akuzohen se nuk kanë respektuar urdhrat e policisë.

< Paraprake		Pasuese >