Komandanti i KFOR-it, Markus Bentler, priti sot si mysafir shefin e shtabit të përgjithshëm të ushtrisë së Serbisë, Milloje Miletiqin.

Vizita e këtij të fundit në Prishtinë, ishte paralajmëruar dhe nga Ministria e Mbrojtjes e Serbisë, ndërsa është konfirmuar edhe nga përgjegjësit e KFOR-it.

Në takimin që u zhvillua në Komandën e trupave ndërkombëtare në Prishtinë, dy gjeneralët ishte paraparë të bisedojnë për bashkëpunimin e Ushtrisë së Serbisë dhe KFOR-it, si dhe për situatën e sigurisë përgjatë vijës kufitare Kosovë-Serbi.

Miletiq është shefi i dytë i shtabit të përgjithshëm të ushtrisë së Serbisë, përkatësisht Malit të Zi, i cili pas vitit 1999 viziton Prishtinën.

Para pesë vjetësh këtu ka qëndruar Dragan Paskash, në ceremoninë e dorëzim-pranimit të detyrës së komandantit të KFOR-it. Për shkak të pranisë së tij me ftesë të ish-komandantit Iv de Kermabon, ceremoninë e patën bojkotuar përfaqësuesit e institucioneve të Kosovës, TMK dhe Policia e Kosovës, ish-Shërbimi Policor i Kosovës i atëhershëm.

< Paraprake		Pasuese >