“Përshëndesim angazhimin e Prokurorisë Speciale dhe EULEX-in që të hetojnë dyshimet për korrupsion, kërkojmë dhe presim që këto hetime të prodhojnë rezultate konkrete”.

Kjo është cituar në një deklaratë të përbashkët të organizatave jo-qeveritare për sundimin e ligjit në Republikën e Kosovës.

Në vazhdim thuhet se një zmbrapsje nga iniciativa aktuale do të ishte një goditje shumë e dëmshme për Sundimin e Ligjit dhe sigurinë në Kosovë.

Krimi i organizuar dhe Korrupsioni sipas organizatave, po pengojnë të ardhmen Evropiane të Kosovës dhe luftimi i këtyre fenomeneve nuk guxon të lihet në mëshirën e agjendave të politikës ditore dhe interesave personale.

“Reagimet e udhëheqësve të Qeverisë dhe Kuvendit të Kosovës, si dhe të partisë më të madhe në vend, të bëra ditëve të fundit ndaj punës së organeve të drejtësisë, na bëjnë të shqetësohemi ngase lejojnë hapësirë për dyshime në përkushtimin e sinqertë të tyre në luftën kundër korrupsionit dhe krimit të organizuar”.

Tendencat për të prezantuar punën e organeve të drejtësisë si të rrezikshme për stabilitetin e vendit janë një kërcënim tjetër serioz për forcimin e sundimit të ligjit në Kosovë, thuhet më tej në deklaratë. Në reagimin e oraganizatave shqiptare theksohet se ndryshimi i retorikës së Qeverisë së Republikës së Kosovës ndaj Bashkësisë Ndërkombëtare pas bastisjeve në Ministrinë e Transportit dhe Telekomunikacionit është i papranueshëm për më tepër është i dëmshëm për interesat e vendit.

"EULEX duhet të krijojë hapësirë për përfshirjen e Prokurorëve kosovarë si dhe të sigurojë se edhe pas përfundimit të Misionit EULEX, Prokuroria Kosovare do të jetë në gjendje që me sukses të ndjekë dhe luftojë krimin e organizuar dhe korrupsionin", thuhet në deklaratën e përbashkët të 15 organizatave.
 

< Paraprake		Pasuese >