Analisti serb Zhivojin Rakoqeviq ka thënë në një intervistë për Klan Kosovën se nuk rregullohet gjithçka me zgjidhjen e çështjes se veriut, duke iu referuar kështu strategjisë për veriun që ka synim integrimin e asaj pjese të vendit.

“Nuk ka rrymë, nuk ka ujë, policët dhe mjekët janë në grevë, e thuhet se me integrimin e serbëve të veriut do të rregullohet gjithçka. Kjo nuk qëndron aspak”, ka thënë Rakoqeviq.

Komenti i tij vjen vetëm një orë pas emërimit të një ekipi përgatitor për themelimin e komunës së Mitrovicës Veriore nga shefi i ICO-së Pieter Feith.

Rakoqeviq, mendon se integrimi i veriut nuk mund të bëhet pa kthimin e serbëve nëpër pjesët e tjera të Kosovës e strategjia e re, sipas tij, do të ketë efekt të kundërt.
Zhivojin Rakoqeviq ka deklaruar se ky plan vetëm sa e forcon ndarjen në lumin Ibër.
Kuvendin e të enjtes të serbëve të veriut për ta kundërshtuar strategjinë, e arsyeton me faktin se ata njerëz nuk kanë jetë institucionale në Prishtinë, dhe u duhet të organizohen në një mënyrë apo tjetër.

Por, mendim të njëjtë për strategjinë nuk kanë edhe serbët që janë pjesë e institucioneve kosovare.

Ndërkohë ministri për Kthim Sasha Rashiq ka thënë se çdo plan që ka synim stabilizimin dhe ofrimin e një jete më të mirë për qytetarët do të mbështetet prej tyre. “Unë si ministër i Qeverisë së Kosovës do ta mbështes një plan të tillë”, ka thënë Rashiq.

Ministri i Kthimit, tha se tubimi i së enjtes në veri të Mitrovicës, është e drejtë e njerëzve për të shprehur pakënaqësinë ndaj vendimeve të qeverisë.

< Paraprake		Pasuese >