Sekretarja amerikane e Shtetit, Hillari Klinton ka dënuar planet e një grupi të krishterë në SHBA për djegien e Kuranit më 11 shtator, në nëntë vjetorin e sulmeve terroriste në Shtetet e Bashkuara.

Drejtuesi i kishës në Florida, Terri Xhons theksoi se islami është “një fe e dhunshme dhe shtypëse” dhe shtoi se po vazhdon të lutet për djegien publike të librit të shenjtë të fesë islame.

Por, drejtuesit kryesorë fetarë, të krishterë e hebre në Shtetet e Bashkuara të Amerikës i kanë dënuar thirrjet për djegien e Kuranit, dhe e kanë cilësuar si sulm ndaj lirisë fetare dhe dëshmi e mungesës së tolerancës. Planet në fjalë janë dënuar dhe nga administrata amerikane, e cila ka theksuar se veprime të tilla rrezikojnë trupat e SHBA-ve në botë.

Sekretarja amerikane e Shtetit, Hillari Klinton foli për këtë çështje dhe gjatë iftarit të shtruar në Departamentin e Shtetit.

“Jemi ulur së bashku ditën kur vjen lajmi se një prift në Florida do vazhdojë me planet për djegien e Kuranit të shenjtë më 11 shtator. Jam e emocionuar nga dënimi i qartë e i padiskutim që i kanë bërë këtij veprimi të padenjë udhëheqësit e të gjitha feve në Amerikë, nga të krishterët evangjelistë tek rabinët hebre, krerët sekularë dhe opinionbërësit”, tha Klinton.

 

< Paraprake		Pasuese >