Këshilli për Mbrojtjen e të Drejtave e të Lirive të Njeriut ka kundërshtuar projektligjin për Qendrën Historike të Prizrenit me vlerësimin se ky dokument bjen ndesh drejtpërdrejtë me pakon e Ahtisarit, e cila e përcakton Kuvendin e Komunës në Prizren si autoritet që duhet të themelojë atë.
Sipas kësaj organizate projektligji është në kundërshtim të plotë edhe me parimet themelore të Kushtetutës, siç janë laiciteti dhe neutraliteti i shtetit për çështjet e besimeve fetare. Ndërkohë, rrjeti i Grupeve të Grave të Kosovës ka bërë të ditur se e përkrah protestën e shoqërisë civile në Prizren për të kundërshtuar ligjin për Qendrën Historike të Prizrenit. Ky rrjet mendon se argumentet e shoqërisë civile të Prizrenit janë të qëndrueshme dhe beson se reagimi qytetar në Prizren duhet të përkrahet. Prandaj, u bëjnë thirrje të gjitha organizatave anëtare të Rrjetit si dhe qytetarëve të Kosovës që më 29 janar 2012 të jenë në përkrahje të qytetarëve të Prizrenit.

< Paraprake		Pasuese >