Është zbuluar një kamion bunker, i cili kontrabandonte mallra, nga pjesa veriore e Mitrovicës për në jug. Sipas policisë, e cila e identifikoi kamionin nëpërmjet task forcës, makina u ndalua tek ura lindore mbi lumin Ibër, ndërsa gjatë kontrollit fillestar, dukej se ishte i zbrazët. Por me dyshimin se në të mund të ketë të fshehur diçka, ngasësi është urdhëruar të shkojë deri në terminalin doganor, ku pas ekzaminimeve të task forcës, është zbuluar bunkeri i cili ishte i mbuluar me dërrasa.
Në automjetin transportues, të fshehura në bunkerin e kamufluar, janë identifikuar sasi të pijeve alkoolike, pije të gazuara joalkoolike dhe gjëra ushqimore, kryesisht produkte të qumështit.
Sasia e mallit të kontrabanduar, me prejardhje nga Serbia, sipas ngasësit të automjetit, besohet të jetë mbi dy mijë euro, vlerë e furnizimit.
Malli i kontrabanduar është sekuestruar nga autoritetet doganore ndërsa kamioni transportues është ndalur gjithashtu deri në përfundim të procedurave doganore.

< Paraprake		Pasuese >