Asambleja e Përgjithshme e Këshillit të Evropës është duke debatuar rreth raportit të Dick Martit, i cili pretendon se UÇK-ja ka trafikuar me organe njerëzore. Shumica e përfaqësuesve të 47 vendeve anëtare në këtë institucion evropian, u shprehën pro nisjes së hetimeve të pavarura rreth pohimeve të senatorit zviceran. Delegacionet e Shqipërisë e Turqisë e kritikuan raportin e Dick Marty-t si të njëanshëm që ka për shënjestër kryeministrin kosovar Hashim Thaçin. Përfaqësuesi i Shqipërisë, Shpëtim Idrizi, e konsideron raportin si përpjekje për barazimin e viktimës dhe kriminelit, duke aluduar në krimet që kanë kryer forcat serbe ndaj shqiptarëve të Kosovës. Ndërkaq, kolegu i tij turk, Özlem TÜRKÖNE, çmoi lartë gatishmërinë e institucioneve kosovare për çfarëdo hetimi ndaj akuzave të Dick Martit. Serbët e Rusët e përshëndetën guximin e këtij të fundit duke akuzuar politikanët ndërkombëtar që kanë mbyllur sytë para një krimi të tillë.

< Paraprake		Pasuese >