Presidenti i Kosovës, Fatmir Sejdiu udhëtoi të dielën për në Nju-Jork. Ai sëbashku me kryeministrin Hashim Thaçi është takuar me Presidentin e Republikës së Afrikës Qëndrore François Bozizé, të cilit i ka kërkuar njohjen e Kosovës, pasi është informuar me të arriturat ndërkombëtare të saj.

Nga ana e tij presidenti Bozizé tha se dihet qartë vullneti i popullit për njohje por la të kuptohet se kjo çështje mbetet për t’u analizuar.

Presidenti Sejdiu u takua edhe me Presidentin e Ruandës, ndërsa delegacioni i tij i përbërë nga Kryeministri Thaçi, Ministri Hyseni dhe nga përfaqësues të tjerë, darkuan me Kryeministrin e Shqipërisë, Sali Berisha dhe me delegacionin e tij.

Ata diskutuan rreth koordinimit të mëtejshëm dhe bashkëpunimit të ngushtë mes të dyja shteteve si dhe procesin e njohjes së pavarësisë së Republikës së Kosovës.

Delegacioni kosovar është i ftuar në pritjen e organizuar nga Presidenti amerikan Barak Obama, me rastin e fillimit të punimeve të Asamblesë së Përgjithshme.
 

< Paraprake		Pasuese >