Institucionet e Kosovës i kanë mirëpritur ndryshimet në rezolutën për Kosovën.

Kryetari i Kuvendit Jakup Krasniqi gjatë një paraqitje për media ka deklaruar se rezoluta e ndryshuar merr në konsideratë mendimin këshillëdhënës të Gjykatës ndërkombëtare të Drejtësisë, e që sipas tij ka konkluduar qartë se shpallja e pavarësisë së Kosovës është në përputhje të plotë me të drejtën ndërkombëtare.

Krasniqi ka deklaruar se ndryshimet e bëra janë në të mirë të të dy vendeve Kosovës por edhe Serbisë, por tha se këto ndryshime do të ndikojnë edhe në stabilitetin politik të rajonit.

Edhe zëvendëskryeministri i Kosovës Hajredin Kuqi tha se ndryshimet e bëra ishin e vetmja alternativ që ajo të përkrahet nga vendet e BE dhe SHBA. Ai tha se shteti i Kosovës është i hapur për fqinjësi të mirë dhe bashkëpunim por nuk do të ketë kurrfarë bisedimesh për statusin dhe çështje tjera të brendshme.

Edhe ndërkombëtarët flasin me të njëjtat tone. Gjermania dhe Franca, përshëndesin ndryshimin e draft-rezolutës serbe për Kosovën, që do të diskutohet sot në Asamblenë e Përgjithshme të Kombeve të Bashkuara.

Ministrat e jashtëm, Guido Vestervelle dhe Bernard Kouchner kanë deklaruar se marrëveshja që Beogradi arriti me Brukselin, është një hap drejt dialogut Prishtinë Beograd, të cilin dy vendet Gjermania e Franca, e dëshirojnë.

Sipas tyre, ky dialog është i nevojshëm për nxitjen e bashkëpunimit rajonal dhe hap rrugën drejt integrimit në Bashkimin Evropian.
 

< Paraprake		Pasuese >