Këshilli për Mbrojtjen e të Drejtave të Luftëtarëve të UÇK-së e ka cilësuar të papranueshëm Ligjin për kategoritë e dala nga lufta, në formën si është miratuar nga Kuvendi i Kosovës të martën.

Përmes një komunikate për media, kryetari i këtij këshilli, Xhevdet Qeriqi ka thënë se Këshilli për Mbrojtjen e të Drejtave të Luftëtarëve të UÇK-së nuk do të lëshojë pe në Nenin 6, Pika 4 dhe në Nenin 13 mbi të drejtat dhe beneficionet e veteranëve të UÇK-së, që flet për ndaljen e pensionit të ish- pjesëtareve të TMK-së, pas hyrjes në fuqi të këtij ligji.

“Ne si këshill nuk pajtohemi, as me ndarjen e veteranëve në dy grupe, ku një pjesë e tyre nuk mund të kenë beneficione pa i mbushur 50 vjet. Nuk pajtohemi as me nenin që flet për ofrimin e shërbimeve shëndetësore, ku thuhet se veteranëve u ofrohen shërbime shëndetësore pa kompensim”, thuhet në reagimin e KMDL të UÇK-së.

Qeriqi ka kërkuar nga institucionet e Kosovës që të bëjnë ndryshime në këtë ligj, në atë mënyrë që ai, t’i përmbushë nevojat dhe kërkesat e familjeve të dëshmorëve e veteranëve për një jetë të dinjitetshme.

< Paraprake		Pasuese >