Ministri i Jashtëm i Serbisë, Vuk Jeremiq, i ka thënë B92-shit se Beogradi nuk planifikon tërheqjen e propozim rezolutës për Kosovën në Asamblenë e Përgjithshme të OKB-së.

Sipas tij rezoluta nuk është një qëllim, por një mjet duke shtuar se atë që dëshiron të arrijë Serbia në Kombet e Bashkuara është përmbyllja e procedurës para Gjykatës Ndërkombëtare të Drejtësisë dhe hapja e rrugës për negociata të reja që do të çonin tek zgjidhja për Kosovën.

Jeremiq ka shtuar se vendi i tij po zhvillon bisedime dhe negociata intensive, me të gjithë faktorët ndërkombëtarë, përfshirë edhe ata nga BE-ja.

Në një intervistë dhënë mbrëmë TV B92, Jeremiq theksoi se më 9 shtator në mbledhjen e Asamblesë së Përgjithshme të KB dëshiron të arrijë vazhdimin e përpjekjeve që Serbia të pengojë vendosjen e shtetësisë së Kosovës.
 

< Paraprake		Pasuese >