Drejtori i Qendrës Klinike Universitare të Kosovës, Ali Sadriu, të hënën në mëngjes është kthyer në vendin e tij të punës pas suspendimit me pagesë nga ministri Bujar Bukoshi.

Kosovapress bën të ditur se atij i është bërë një pritje e veçantë nga stafi i QKUK-së.

Për rikthimin e Sadriut, stafi i QKUK-së, në shenjë nderimi ishin renditur para objektit të Klinikës së Kirurgjisë, aty edhe ku është zyra e drejtorit ekzekutiv të QKUK-së, ku kishin shtruar qilim të kuq duke i dhuruar lule dhe duartrokitur pa pushim.

Kthimi i tij në krye të institucionit të shëndetësisë, ka ndodhur pasi Komisioni Disiplinor i Ministrisë së Shëndetësisë pas disa seancave të mbajtura dhe pas shqyrtimit të dokumentacionit, nuk ka arritur të gjejë shkelje të procedurave dhe mosrespektim të hierarkisë, ashtu siç ishte pretenduar nga ushtruesi i detyrës së sekretarit të përhershëm të MSH-së më 25 qershor të këtij viti.

Interesimit të madh të mediave, Sadriu i është përgjigjur me pak fjalë “do vazhdojë punën aty ku e kam lënë”.
Ai ka shprehur besimin se do ta ketë edhe më tutje mbështetjen e Ministrisë së Shëndetësisë.

Kurse ushtruesi i detyrës së drejtorit të QKUK-së, Sejdulla Hoxha këtë kthim e ka quajtur normal.
 

< Paraprake		Pasuese >