Sistemi arsimor në Prishtinë, është ndarë në dysh në ditën e parë të rifillimit të mësimit në shkollat fillore dhe të mesme. Disa shkolla të kryeqytetit po mbajnë greva.

Të tjerat, po punojnë, e disa po punojnë pjesërisht.
Kryesuesit e sindikatës së arsimit për Prishtinën, të cilët paralajmëruan grevë në sistemin arsimor në kryeqytet, thonë se 80 për qind e shkollave nuk po mbajnë mësimin.

Ndërsa drejtori për arsim i Prishtinës, thotë se mësim po mbajnë mbi 80 për qind e shkollave.

E gjithë kjo rrëmujë u shkaktua për shkak të pakënaqësive të mësimdhënësve. Ata po kërkojnë paga më të mëdha. Ndryshe greva është paralajmëruar vetëm për ditën e sotme. Në rast se nuk plotësohen kërkesat e punonjësve të arsimit, sindikalistët thonë se do të hynë në grevë të përgjithshme në tetor.

Ndërkohë qeveria është e vetëdijshme se ende duhet bërë më shumë që të përmirësohen kushtet materiale, financiare dhe profesionale për të gjithë arsimtarët dhe punonjësit e arsimit. Kjo është porosia që bartë urimi i kryeministrit Hashim Thaçi në ditën e fillimit të vitit të ri shkollor, sipas të cilit kontributi i mësimdhënësve vazhdon të jetë i respektuar, i çmuar.

Ai shprehu besimin se do të jetë një vit i mbarë dhe rezultatdhënës.

Thaçi tha se, ngritjen e cilësisë në arsim dhe investimin në infrastrukturë, qeveria e ka pasur dhe do ta ketë prioritet të patejkalueshëm, me vetëdijen se investimi në arsim është investim në ekonomi, përparim dhe ardhmëri të sigurt të vendit tonë.

< Paraprake		Pasuese >