Erdhi në Beograd për të qartësuar pozicionin britanik për Kosovën. Krye diplomati britanik William Hague të martën e përsëriti atë që serbëve ua tha edhe homologu i tij gjerman Guido Westerwelle.

Sipas tij Kosova është një çështje e mbyllur, derisa Serbisë i mbetet të fokusohet për tu integruar në BE.

“Pozicioni im është i njëjtë si Ministri i Jashtëm gjerman, kolegu im i cili erdhi këtu javën e shkuar. Nëse vendet e Ballkanit nuk do të integroheshin në BE, atëherë Serbia do të mbeste ndërmjet të kaluarës dhe të ardhmes”, tha Hague.

Jeremiq nuk ka problem me pikëvështrimin strategjik që është BE-ja.

Problemi i tij qëndron te Kosova, për të cilën thotë se të drejtën do ta kërkojë në asamble.

“Ne do të bëjmë të gjithë atë që është e mundur që rezoluta jonë në OKB, të marrë mbështetje. Por them se ka disa linja të kuqe të cilat Serbia nuk mund t’i tejkalojë”, ka thënë Ministri i Jashtëm serb Vuk Jeremiq.

Ndryshe Bashkimi Evropian i ofroi ndihmë Serbisë për të zhvilluar bisedime me Kosovën për çështje praktike- teknike.
Blloku 27 anëtarësh kërkoi nga Serbia të ndryshojë tekstin e rezolutës, që do ta paraqesë më 6 shtator.
 

< Paraprake		Pasuese >