Shefi i UNMIK-ut Lamberto Zannier është takuar Beograd me zv/kryeministrin dhe ministrin e punëve të brendshme të Serbisë Ivica Dacic.

Ky i fundit i tha gazetarëve se bisedimet u fokusuan në nevojën që të gjitha subjektet e involvuara të mbështesin dialogun mes serbëve dhe shqiptarëve në Kosovë, për të zgjidhur sipas tij të gjitha çështjet e hapura.

Sekretari i shtetit në ministrinë e ashtuquajtur për Kosovën dhe Metohinë Oliver Ivanovic, i ka thënë B92-shit se në këtë vizitë të Zannier-it, Serbia pret nga misioni që ai drejton t’i mundësojë një dialog me status neutral me shqiptarët e Kosovës.

 “Është e qartë që ne nuk mund të flasim rreth furnizimit elektrik, derisa të zgjidhim cështjen e statusit të Kosovës, i cili është ende i pazgjidhur, për aq kohë sa ana serbe është e shqetësuar”, ka thënë ai.

Ivanoviç ka shtuar se UNMIK-u është i mirëpritur pasi sipas tij është e vetmja organizatë ndërkombëtare e ligjshme në atë zonë, i vetmi me të cilin mund të arrihen marrëveshje politike.

Shefi i UNMIK-ut është takuar edhe me Ministrin për Kosovën në Qeverinë e Serbisë ku kanë thënë se është i “domosdoshëm forcimi i rolit të UNMIK-ut në veri të Kosovës dhe në enklavat serbe.

Zanier dhe Bogdanoviq vlerësuan se është e domosdoshme që sa më parë të fillojë dialogu, i cili sipas tyre është mënyra e vetme për zgjidhjen e “të gjitha çështjeve të hapura”.

Bogdanoviq ka insistuar që UNMIK-u të ofrojë siguri për të gjithë qytetarët, kthimin e të zhvendosurve dhe pronat.

Ai ka shfaqur edhe shqetësimin e tij në lidhje me vendimin e KFOR-it që për sigurinë e manastireve serbe në Kosovë të përkujdeset Policia e Kosovës.

Sipas tij, ky vendim ka shqetësuar seriozisht serbët e Kosovës.

Bogdanoviq dhe Zanier janë pajtuar se duhet zgjidhur problemin ekzistues në implementimin e Marrëveshjes për Tregti të Lirë në Evropën Juglindore, për mos pengimin e qarkullimit të mallrave dhe thyerjen e kontrabandës.

Ministri Bogdanoviq ka thënë se Serbia është e gatshme për zgjidhje kompromisi dhe se është e pranueshme që dokumentet doganore të vërtetohen me vulat me mbishkrimin “Eulex-Kosova-dogana”.

Ky i fundit mësohet se pas takimi ka ardhur në Kosovë. Sipas burimeve të Klan Kosovës në veri të vendit, Bogdanoviq ka marr pjesë në përurimin e një etno-fshati në Zherovnicë të Leposaviqit.

< Paraprake		Pasuese >