Policia e Kosovës ka filluar nga e hëna të ruajë Manastirin e Graçanicës duke marrë përgjegjësinë nga trupat e KFOR-it. 

Në një njoftim për media thuhet se koha për transferimin e përgjegjësive për ruajtjen e tre manastireve të tjera të aprovuara me atë vendim- manistiri i Budisavcit, Goriocit dhe Zocishtës –nuk është vendosur ende.

Në njoftim thuhet gjithashtu se me transferimin në Gracanicë është bërë një hap i madh për të fuqizuar dukshëm përgjegjesinë e institucioneve të sigurisë së Kosovës, pasi ata do të ruajnë një nga vendet më të vlefshme kulturore dhe fetare në Kosovë. 

Ky veprim është nmdërmarrë në bazë të situatës së përmirësuar në Kosovë dhe besueshmërinë që e ka KFOR-i në aftësitë e Policisë së Kosovës për të performuar këtë detyrë të rëndësishme. 

KFOR-i do të vazhdojë të mbajë të informuar Kishën Ortodokse serbe për hapat e mëtejshme në lidhje me manastiret e Budisavcit, Goriocit dhe Zoçishtës, derisa kushtet per transferimin e përgjegjësive për ruajtje do të jenë të duhura.

Këshilli Veri Atlantik ka bërë të ditur se nuk ka marrë asnjë vendim në lidhje me Patriarkatën e Pejës, manastirin e Decanit, Devicit dhe Manastrin e Kryeengjëjve. Këto vende do të mbrohen nga KFOR-i, i cili deklaron të mbetet i përkushtuar për të përkrahur Policinë e Kosovës në garantimin e sigurisë për këto vende në përputhshmëri me mandatin e vet për një ambient të qetë dhe të sigurtë edhe pas transferit të përgjegjësisë.

< Paraprake		Pasuese >