Në një deklaratë anonime që po qarkullon këtyre ditëve në veriun e Kosovës, dikush po kërkon autonomi për veriun dhe shkëputje nga siç e quajnë autorët: “Krijesa Republikë e Kosovës”. 

“Si shprehje e vullnetit të lirë të qytetarëve serbë, Kuvendi aprovon deklaratën e pavarësisë së territoreve të komunave që përbëjnë lidhjen e komunave të krahinës autonome të Kosovës nga krijesa të cilën krijuesit e quajnë Republika e Kosovës”, thuhet në tekstin e deklaratës.

Në këtë dokument, i mbushur me urrejtje ndaj shqiptarëve, kërkohet prani e forcave ushtarake dhe policore ndërkombëtare si domosdoshmëri për të siguruar jetën e qytetarëve ne territorin e komunave serbe. Rreziku vie nga, siç shkruan deklarata, “shovinistët shqiptarë”.

Derisa Kosovën e quajnë krijesë gjenocidale, hartuesit e deklaratës, kërkojnë pjesëmarrje në negociatat për Kosovën. 

Por, Beogradi zyrtar nuk e mbështet iniciativën e serbëve të Kosovës për shpalljen e pavarësisë. Dy zyrtarë të lartë të qeverisë së këtij shteti, ministri për Kosovën, Goran Bogdanoviq, dhe sekretari shtetëror në këtë ministri, Oliver Ivanoviq, thanë se qeveria serbe nuk qëndron prapa të ashtuquajturës “Deklaratë” për pavarësimin e komunave nga përbërja e Bashkësisë së komunave të krahinës autonome të Kosovës e Metohisë”.

Bogdanoviq, tha për mediat serbe se ky pamflet, të cilin “dikush e paraqet si “deklaratë”, jo vetëm se mund të përkeqësojë situatën e sigurisë në Kosovë, por kjo gjë nuk iu nevojitet serbëve.

Ndërkohë Ivanoviq këtë iniciativë e vlerësoi joserioze. Sipas tij, kjo është diçka të ngjashme me nismat e njerëzve të caktuar për bashkimin e Kosovës më Shqipërinë.

Ivanoviq thotë se e ka parë atë letër, por të cilës nuk i ka kushtuar rendësi, derisa është vetëm nismë individuale që nuk gëzon mbështetjen politike të Serbisë.
 

< Paraprake		Pasuese >