Disa turistë nga Shqipëria nuk qëndruan sa kishin planifikuar në Bogë. Ata u larguan nga fshati turistik në Rugovë të Pejës, pasi nuk mundën të durojnë zhurmën e gjeneratorëve. Në fakt ata ishin edhe vizitorët e fundit në këtë fshat, pasi ka tri javë që KEK-u e ka marrë trafon e energjisë elektrike. Mirëpo, ky është vetëm një nga versionet për mungesën e rrymës. Pronarë të komplekseve tjera turistike, ia hedhin fajin politikës. Arsye e ç’kyçjes nga rrjeti elektrik, sipas disave prej tyre është ndarja e Kosovës në zona politike. Edhe më ndryshe thonë banorët e kësaj zone prapa kamerave.
Sipas tyre KEK-u është vetëm ekzekutues i vendimeve politike dhe e vërteta pse ata kanë mbetur në terr qëndron në faktin se ata nuk kanë pranuar të paguajnë haraç. Por në distriktin e KEK-ut në Pejë, thonë se arsye e vetme e heqjes së trafos është mos regjistrimi i njehsorëve dhe borxhi i pa paguar ndaj korporatës. Në total, 57 konsumatorët e regjistruar i kanë borxh KEK-ut mbi 60 mijë euro, po aq para vlerësohet se korporata i ka humbur nga mos evidentimi i konsumatorëve. Megjithatë, borxhi nuk është edhe shumë problem. Vetëm nëse pronarët e bizneseve paraqiten në sportelet e KEK-ut, trafa do tu kthehet në vend.

< Paraprake		Pasuese >