Smail Latifi ka aderuar nëAleancen për Ardhmërinë e Kosovës. Ish kryetari i lëvizjes për integrim dhe bashkim do të jetë i nominuar nga kjo parti për Kryetar të komunës së Rahovecit në zgjedhjet e ardhshme që pritet të shpallen nga presidenti Sejdiu për kryetar të kësaj komune. Kjo është bërë publike sot gjatë një konference për media të Aleances për Ardhmërinë e Kosovës. Lajmi i tillë u pati bërë publik fillimisht nga Klan Kosova, dy ditë më parë. “Unë jam i gatshëm edhe një herë që mandatin, besim të cilin ma kanë dhënë Aleanca për Ardhmërinë e Kosovës, ta materializoj me votë të qytetarëve dhe ta kthej në qeverisje të mirë, të përgjegjshme, transparente, të ligjshme dhe stabile në Komunën e Rahovecit”, tha Latifi para gazetarëve. Ndërkohë ai mohoi të ketë hequr dorë nga idealet për bashkim kombëtar, me aderimin e tij në AAK, meqë në programin e kësaj të fundit, nuk parashihet bashkimi kombëtar, përderisa programi i LIB-it kishte si qëllim kryesor bashkimin e të gjitha trojeve shqiptare. Nënkryetari i AAK-së, Blerim Shala nga ana tjetër e vlerësoi lart angazhimin e siç e quajti ai të atdhetarit të çështjes kombëtare në AAK dhe njëherësh kërkoi nga presidenti i Republikës që t’i shpallë zgjedhjet për kryetar të Komunës së Rahovecit, sa më shpejtë që të jetë e mundur. Shala, u shpreh i bindur se AAK do t’i fitojë zgjedhjet në këtë komunë, bile ai Latifin e prezantoi si kryetar të Komunës së Rahovecit.
 

< Paraprake		Pasuese >