Pjesa motorike e një kamioni frigorifer që dyshohet se ka mbajtur trupat e shqiptarëve të vrarë në Kosovë, është gjetur dje në thellësi të Liqenit të Peruqacit i cili ndodhet në territorin e Serbisë. Atje po kërkohet për eshtrat e personave të zhdukur që nga lufta në Kosovë, ajo e Bosnjës e luftës së dytë Botërore. Në njoftimin për media, thuhet se nga gjetja e motorit, del se kabina ka qenë e shkëputur nga pjesa tjetër e kamionit, dhe kjo pjese e gjetur është e mbuluar me baltë. Gjatë gërmimeve të së hënës nuk është gjetur asnjë mbetje kockore. Supozohet se trupat janë në thellësi, dhe sipas informatave ata janë lidhur me blloqe betoni e më pas janë fundosur. Gjetjen e kockave, e bënë edhe më të vështirë faktin se tashmë kanë kaluar 11 vjet nga lufta dhe shtresa e baltës është relativisht e trashë. Megjithatë kërkimet po vazhdojnë edhe sot ku është duke u kontrolluar hapësira rreth kamionit të izoluar me ekipet e zhytësve. Kërkimet po bëhen nga ekspertë vendorë e ndërkombëtar.
 

< Paraprake		Pasuese >