Ambasadori i Norvegjisë në Kosovë, Sverre Johan Kvale, është angazhuar që Ramush Haradinaj të lirohet nga paraburgimi në Tribunalin e Hagës deri në përsëritjen e gjykimit.

Në një letër në mbrojtje të Haradinajt, të cilën e ka dërguar si “qytetar privat”, ambasadori Kvale i ka dhënë përkrahje të plotë përpjekjeve të avokatëve që Haradinajn ta kthejnë në Kosovë, raporton radioja beogradase B92, thote Kosovapress.

Mbrojtja e Haradinajt, letrën e ambasadorit norvegjez ia ka dorëzuar gjykatës në favor të kërkesave për lirimin e përkohshëm të Haradinajt.

Ambasadori norvegjez në letër paralajmëron se “mungesa” e Haradinajt nga Kosova “aktualisht krijon vakum politik, i cili shumë lehtë mund ta destabilizojë Kosovën, skenar ky që askush nuk e dëshiron”.

“Haradinaj është shumë i nevojshëm si lojtar i rëndësishëm në skenën politike të Kosovës, jo vetëm partisë së tij, por edhe më shumë për shkak të ndërtimit të demokracisë së qëndrueshme. Që kur e njoh, Haradinaj ka qenë faktor politik stabilizues edhe në nivelin lokal edhe më gjerë në Kosovë”, ka shkruar ambasadori Kvale.

Sipas tij, nuk ekziston rreziku që Haradinaj të mos kthehet në gjykim, pasi që në rastet e mëhershme gjithmonë iu ka përgjigjur tribunalit vullnetarisht.

“Besoj se kështu do të jetë edhe nëse Haradinaj lirohet dhe kthehet në Kosovë deri në fillimin e gjykimit”, shkruan ambasadori.

“Ne respektojmë Tribunalin e Hagës dhe vendi im gjithnjë ka përkrahur aktgjykimet që ka sjellë. Kësisoj është edhe me procesin Haradinaj”, ka thënë Kvale.

 

< Paraprake		Pasuese >