Drejtoria për hetimin e krimeve ekonomike dhe korrupsionit në Gjilan, ka identifikuar një grup në rajonin e Gjilanit, të cilët dyshohet se në mënyrë kundërligjore janë futur në sistemin kompjuterik dhe përmes internetit kanë bërë keqpërdorimin e kartelave të kreditit duke përvetësuar shuma të konsiderueshme parash nga llogaritë e qytetarëve nga SHBA, Britania, Pakistani, Kuvajti etj.

Ata janë, R. SH. 1988 dhe A. M. 1988.

DHKEK në Gjilan ka bastisur shtëpitë e dy të dyshuarve si dhe një internet kafe. Policia pas kontrollit ka sekuestruar dy shtëpiza kompjuteri, 4 copë flesh dhe 69 copë CD.

Këto pajisje kompjuterike dyshohet që të dyshuarit i kanë përdorur për kryerjen e veprës penale “Lëshimi i çeqeve pa mbulesë ose të rreme dhe keqpërdorim i kartelave të bankës apo kreditit”.

Nga grupi i personave të dyshuar policia deri më tani ka intervistuar 8 persona, kurse dy të arrestuarve u është caktuar masa e ndalimit policor me dyshimin se të njëjtit kanë përfituar në mënyrë të kundërligjshme shumë prej 15 mijë euro.
 

< Paraprake		Pasuese >