“Ndërtimi i Termocentralit Kosova e Re do t’ia largoi kosovarëve terrin që u ka shkaktuar KEK-u tash e dhjetë vite”. Së paku kështu ka premtuar kryeministri i Kosovës, Hashim Thaçi të hënën. Sipas tij, ky projekt i garanton Kosovës 24 orë rrymë. Përveç kësaj, Kosova e re hap perspektivë për zhvillimin ekonomik, për zhvillimin e bizneseve dhe krijimin e vendeve të reja të punës. Ndërkaq, ministrja e Energjisë dhe Minierave, Justina Shiroka-Pula, ka pohuar se pas shumë analizave dhe ndikimeve të institucioneve ndërkombëtare rreth zhvillimit të projektit tashmë është arritur të definohet finalizimi i këtij projekti dhe t’u dorëzohet draft-kërkesa katër konzorciumeve të përzgjedhura. Ajo ka lënë të kuptohet se ende nuk është definuar saktësisht se sa do të jetë pronësia e Qeverisë së Kosovës në këtë Termocentral. Përveç që dihet se në njësinë e gjenerimit shteti mund të ketë deri në 30 për qind aksione, nuk dihet se sa do të rriten aksionet me futjen e Kosovës në këtë projekt.

< Paraprake		Pasuese >