Një takim i peshkopit serb Amfilohije me koordinatorin e Qeverisë së Kosovës për veri, Ylber Hysa, fundjavën e kaluar ka shkaktuar reagime të ashpra në Serbi. Sipas Kohës Ditore, e cituar nga agjensia e lajmeve“Telegraf”, Këshilli Nacional Serb për veriun e Kosovës publikisht ka kritikuar peshkopin pse është takuar me zyrtarin kosovar që është i ngarkuar me zbatimin e strategjisë së Prishtinës për integrimin e veriut të Kosovës. Në një komunikatë për media, këshilli ka thënë se takimi i 2 gushtit në Kishën Ortodokse në veri, ku ishte i pranishëm edhe zyrtari i qeverisë serbe, Oliver Ivanovic zgjon dyshime edhe për faktin se nuk raportuar fare në mediat serbe, ndërkohë që mediet e Kosovës e kanë raportuar gjerësisht këtë ngjarje. Ndërkohë vetë Amfilohije ka thënë për mediet serbe se takimi në Vushtrri ka qenë i rastësishëm, ku Hysa gjendej në mesin e mysafirëve në ceremoni dhe se nuk bëhet fjalë për çfarëdo bashkëpunimit të Kishës Ortodokse Serbe me institucionet e Kosovës. Në anën tjetër, Oliver Ivanovic ka thënë se në Vushtrri nuk e ka pritur askënd dhe se aty ka qenë mysafir në hapjen e Kishës së Shën Ilisë dhe drekën e festës.
 

< Paraprake		Pasuese >