Kryetari i Aleancës për Ardhmërinë e Kosovës, Ramush Haradinaj, ka kërkuar të hënën nga Gjykata e Hagës, që të lirohet përkohësisht deri në fillimin e procesit gjyqësor, njofton "Kosovapress".

Edhe mediat në Beograd, lajmërojnë se ekipi mbrojtës i Ramush Haradinajt, ka kërkuar që klientit të tyre t’i mundësohet mbrojtja në liri, derisa të mos fillojë ri-gjykimin e tij i pjesshëm.

Sipas agjencisë serbe BETA, kërkesa është dorëzuar të hënën në Gjykatën e Hagës. Ajo citon kërkesën e mbrojtjes se me mbrojtjen e tij nga liria, Ramush Haradinaj nuk paraqet rrezik për dëshmitarët dhe se nuk ka bazë për një ndërlidhjeje të tillë.

Në anën tjetër, zyrtarët nga Aleanca për Ardhmërinë e Kosovës, thonë se kjo kërkesë e cituar është paraqitur javën e shkuar. E nga EULEX-i, sqarojnë të mos kenë pranuar asnjë kërkesë nga Tribunali i Hagës, qoftë si garanci për lirimin e Haradinajt apo të sigurimit të çfarëdo dëshmitari.

Dhoma e Apelit e Tribunalit të Hagës për Krime të Luftës në ish-Jugosllavi, në seancën e mbajtur më 21 korrik të këtij viti, ka vendosur që procesi kundër Ramush Haradinjat, Idriz Baljat dhe Lah Brahimit, të përsëritet pjesërisht.





 

< Paraprake		Pasuese >