Në kohën kur ka filluar të debatohet se përse nuk po arrijnë njohjet e propaganduara, ministri i jashtëm Skender Hyseni nga New York-u paralajmëron se ka marrë dhjetëra premtime për një akt të tillë. Duke folur para gazetarëve të akredituar në Kombet e Bashkuara, shefi i diplomacisë kosovare tha se premtimet i janë dhënë atij personalisht se pas GJND-së vende të ndryshme do të ndryshojnë qëndrimin e tyre karshi Kosovës. Ai nuk ka folur me shifra se sa shtete do ta njohin pavarësinë, por i pyetur nëse numri do të jetë mbi 100, ai ka pohuar me kokë. Hyseni, i shfaqur në disponim, foli edhe për lobimin që po zhvillon Kosova me miqtë e saj për anëtarësimin në OKB. Ministri i Jashtëm pritet të takohet të hënën me Sekretarin e Përgjithshëm të OKB-së, Ban Ki Moon, ndërsa të martën ka kërkuar që t’i adresohet Këshillit të Sigurimit, që diskuton për Kosovën. Krahas lobimit të shtuar kosovar, edhe Serbia si gjithnjë, ka nisur një fushatë të re pas mendimit të GJND-së. Tashmë emisarët serbë janë dërguar në 55 shtete, për të përcjellë mesazhin e Presidentit serb, Boris Tadiq, që mos ta njohin Kosovën.

< Paraprake		Pasuese >