Serbia kërkon edhe një shans.
Ajo i dorëzoi një rezolutë Kombeve të Bashkuara me kërkesën që të zgjidhet statusi i Kosovës përmes negociatave. Shefi i diplomacisë serbe Vuk Jeremiq për këtë punë do të lobojë në OKB, ndërsa takimin e parë e ka caktuar me sekretarin e përgjithshëm Ban Ki-moon. Sipas Ministrisë së Jashtme të Serbisë, rezoluta vë në pah se ndarja e Kosovës nga Serbia, ishte e njëanshme dhe si e tillë është e papranueshme si zgjidhje për çështjet territoriale. Rezoluta e Serbisë është paraqitur për miratim në Asamblenë e Përgjithshme të Kombeve të Bashkuara ku propozohet konkludimi në lidhje me mendimin këshillëdhënës të Gjykatës Ndërkombëtare të Drejtësisë për Kosovën. Ministria e Jashtme serbe thotë se kjo nismë e tyre është diskutuar me një rreth të gjerë të aktorëve ndërkombëtar, përfshirë këtu edhe me 5 vendet e përhershme të Këshillit të Sigurimit të OKB-së. Se a e gëzon apo jo Serbia përkrahjen e Sh.B.A-së, Kinës, Rusisë, Britanisë dhe Francës, do të mësohet javën e ardhshme kur ky trup ndërkombëtar vendimmarrës do të debatojë për Kosovën.

< Paraprake		Pasuese >