Këshilltari i kryeministrit të Republikës së Kosovës, Dukagjin Gorani ka thënë për “News Tv”, se në asnjë moment nuk e ka përmendur fjalën “status special” në intervistën dhënë gazetës “Blic”. “Absolutisht jo. Të gjitha pohimet tjera janë korrekte, përveç ‘status special’. Mendoj se futja e këtij termi brenda deklaratës sime është e qëllimtë dhe synon krijim të hutisë si në opinionin serb, ashtu edhe në atë kosovar”, ka thënë Gorani për “News Tv”. Ndryshe, gazeta beogradase “Blic”, ka cituar Goranin të ketë thënë se qeveria e Kosovës është e gatshme që në bisedimet me Beogradin të arrijë një zgjidhje për serbët në veri dhe se njëra nga opsionet për këtë, sic raporton e përditshmja në fjalë, është statusi special “në kuadër të kufijve të Kosovës”. “Qeveria e Kosovës dhe kryeministri Thaci shumë herë kanë përsëritur gatishmërinë që me bisedime, negociata e marrëveshje të arrihet zgjidhje optimale për veriun e Kosovës. Tashti është vështirë të thuhet se cfarë zgjidhje do të gjendet, por me deklaratën e tij, kryeministri e ka bërë me dijë, qartë, se ka një gamë të gjerë të zgjidhjeve të mundshme, njëra nga të cilat është edhe statusi special”, citohet të ketë thënë Gorani për Blic, në një intervistë që do të botohet nesër. Nga ana tjetër, Blic raporton se qeveria e Serbisë nuk e ka pranuar e as nuk e ka refuzuar propozimin dhe vlerëson se negociatat për Kosovën mund të fillojnë vetëm pas shqyrtimit në Asamblenë e Përgjithshme t OKB-së, kanë thënë zyrtarë nga kreu shtetëror serbë që kanë kërkuar të mbeten anonimë.

 

< Paraprake		Pasuese >