Bashkimi Evropian do të mbledhë sot ministrat e jashtëm për të diskutuar mbi Kosovën, pas mendimit këshillues të Gjykatës Ndërkombëtare të Drejtësisë, e cila ka vlerësuar se shpallja e pavarësisë së Kosovës nuk ka paraqet shkelje të së drejtës ndërkombëtare. Bëhet e ditur se Brukseli do t'i ofrojë Prishtinës dhe Beogradit mbështetje të plotë politike për dialog që synon ndërtimin e raporteve të mira fqinjësore për një të ardhme më të mirë. Belgjika, e cila është kryesuese e radhës e Bashkimit Evropian, ia ka bërë të ditur Beogradit se ajo që i intereson tani është sjellja e Serbisë pas vendimit të gjykatës. BBC citon burime të Brukselit të kenë thënë se shefat e diplomacive evropiane në takimin e sotëm për Kosovën do të mbështesin deklaratën e përfaqësueses së lartë të BE-së për Politikë të Jashtme dhe Siguri, Catherine Ashton. Baronesha Ashton në deklaratën e saj pas shpalljes së mendimit të Gjykatës Ndërkombëtare të Drejtësisë tha se e mirëpriste atë dhe se BE-ja do ta studionte me kujdes mendimin e dhënë në favor të pavarësisë.

< Paraprake		Pasuese >