Lideri i Lëvizjes Serbe të Ripërtëritjes, Vuk Drashkoviq ka deklaruar se Kosova, pas vendimit të Gjykatës Ndërkombëtare të Drejtësisë, do të bëhet anëtare e Kombeve të Bashkuara, pasi sipas tij, shumica e shteteve do ta pranojnë realitetin dhe mendimin e GJND-së.

Ai pohoi që Serbia ta pranojë mendimin e GJND-së për Deklaratën e pavarësisë së Kosovës, të cilin e ka kërkuar vetë Beogradi, dhe duhet ta ndryshojë strategjinë shtetërore për Kosovën, duke iu përshtatur qëllimeve reale.

Në këtë kuadër, Drashkoviq, theksoi se Serbia me Bashkimin Evropian, duhet të kërkojë zgjidhjet më të mira për popullin serb dhe kishat në Kosovë dhe së bashku me BE-në, ta shkruaj një rezolutë, e cila do t’i paraqitej Asamblesë së Përgjithshme të OKB-së.

“Nuk jemi të detyruar ta pranojmë Kosovën, ashtu sikur që Kina nuk e njeh Tajvanin, por duhet të bashkëpunojmë”, i tha Drashkoviq, gazetës beogradase “Press”.

Sipas tij, zgjidhja duhet të kërkohet në dialog me BE-në, me bashkësinë e gjerë ndërkombëtare dhe me autoritetet në Prishtinë, njofton "Kosovapress".
 

< Paraprake		Pasuese >