Mendimi i Gjykatës Ndërkombëtare të Dretësisë për pavarësinë e Kosovës, ka bërë të reagojnë Abkhazia dhe Osetia Jugore.

E drejta për vetëvendosje e kosovarëve që u legjitimua dy ditë më parë në Hagë, u përshëndet nga liderët e rajoneve separatiste të shkëputura nga Gjeorgjia.
Kreu i De Fakto qeverisë së Abkhazisë, Sergei Shamba të shtunën bëri një paralelizëm në mes vendit të tij dhe Kosovës.

“Ky fakt konfirmon të drejtën e popullatës për vetëvendosje dhe gjithsesi që forcon argumentet tona. Nga ana tjetër gjithçka është e motivuar politikisht. Nëse ne do t’I adresoheshim Hagës, nuk ka asnjë garanci që do të merret vendimi i njejtë, edhe pse ne kemi më shumë argumente juridike, historike dhe morale”, tha Kryeministri i Abkhazisë, Sergei Shamba.

Nga ana tjetër, Zëvendësministri i Jashtëm i Osetisë Jugore Kazbulat Tshovrebov vlerësoi se vendimi i GJND-së për Kosovën, do të sjellë njohje të reja për vendin e tij.

“GJND-ja do të stimulojë shtetet tjera të konsiderojnë njohjen e pavarësisë tonë. Ne themi se pavarësia gjithashtu u shpall jashta ligjit ndërkombëtarë, por ne jemi të gatshëm ta dëshmojmë edhe në OKB për të drejtën tonë për mëvetësi”, është shprehur Tskhovrebov.

Dy rajonet e shkëputura nga Gjeorgjia deri më tani janë njohur vetëm nga Rusia, Venezuela, Nikaragua dhe Nauru.
Ndërkaq, shteti më i ri në botë Kosova, njihet nga 69 vende.

Pas vendimit të GJND-së pritet që shteti më i ri në botë të njihet edhe nga 40 vende tjera.
 

< Paraprake		Pasuese >