Derisa në Hagë po mbahet seanca nga e cila Gjykata Ndërkombëtare e Drejtësisë do të dal me opinionin e saj për pavarësinë e Kosovës, serbët në pjesën veriore kanë paralajmëruar protestë nga ora 17.30 në sheshin kryesor të quajtur “Shumadija” dhe kjo ka barë që forcat e rendit të shtojnë numrin pjesëtarëve në të gjitha mjediset e banuara me popullatë të përzier në rajonin e Mitrovicës.

Deri më tani situata në qytetin e Mitrovicës paraqitet e qetë, porse paralajmërimet për protesta kanë reflektuar edhe në rritjen e gatishmërisë nga forcat e rendit.

Përveç paralajmërimit për protesta, bëhet e ditur se nga ora 17.00 në të gjitha kishat e veriut do të mbahen lutje për paqe dhe për vendim të favorshëm për palën serbe nga gjyqi i Hagës.

Kryetari i qarkut të rajonit të Mitrovicës, Radenko Nedelkoviq ka thënë se bëhet fjalë për protestë të qetë dhe se tani është shumë e rëndësishme që situata të mbetet e qetë.

“Ftoj qytetarët që të mos bien pre e provokimeve dhe të qëndrojnë të qetë, pavarësisht vendimit të gjyqit të Hagës. Të gjithë ne, si dhe shteti ynë amë, Serbia, kurrë nuk do ta pranojmë shpalljen e njëanshme të pavarësisë së Kosovës. Presim vendim të favorshëm për ne, por pavarësisht vendimit ne do të qëndrojmë dinjitoz dhe të qetë në qëndrimet tona, dhe se Beogradi, jam i sigurt së bashku me ne do të kemi planin për çdo solucion”, ka thënë Nedelkoviq.

Ndërkohë Nysret Mehmeti nga policia e Kosovës, bëri të ditur se tashmë policia ka shtuar praninë e forcave të saj në pjesën veriore dhe në të gjitha zonat e banuara me popullatë të përzier.

Ndryshe, banorët e veriut kanë thënë se presin vendimin e gjyqit, por pavarësisht kësaj, ata mendojnë se situata do të mbetet e qetë.

< Paraprake		Pasuese >