Kryeministri i Republikës së Kosovës, Hashim Thaçi në kuadër të vizitës zyrtare që po zhvillon në Shtetet e Bashkuara të Amerikës, ka zhvilluar sot një takim me ish-Sekretaren amerikane të Shtetit, Medllin Ollbrajt.
Në takimin miqësor me Ollbrajt, kryeministri Hashim Thaçi shprehu mirënjohjen e Qeverisë së Republikës së Kosovës dhe të popullit të Kosovës për kontributin që ka luajtur ish-sekretarja Ollbrajt në çlirimin dhe pavarësimin e Kosovës dhe rolin që edhe sot luan Ollbrajt në mbështetje të zhvillimeve në Republikës së Kosovës.
Nga ana e saj, ish-sekretarja amerikane e shtetit, Medllin Ollbrajt rikonfirmoi mbështetjen e saj për Republikën e Kosovës dhe theksoi se ndihet krenare me të arriturat që ka shënuar Kosova, posaçërisht në dy vitet e pavarësisë. Kryeministri Thaçi është takuar edhe me ambasadorin Frank Uisner, me të cilin ka diskutuar për zhvillimet aktuale politike në Kosovë dhe për të arriturat e deritanishme të institucioneve të Kosovës. Kryeministri Thaçi do të pritet në Shtëpinë e Bardhë nga zëvendëspresidenti i SHBA-ve, Joseph Biden, ndërsa nesër do të ketë takime në Kongresin e SHBA-së.
 

< Paraprake		Pasuese >