Një fitore e madhe e Tribunalit të Hagës, Serbisë dhe viktimave të luftës së Kosovës. Kështu u fol të mërkurën në Beograd, pas vendimit të Gjykatës për Krime Lufte për ish Jugosllavi, që Ramush Haradinaj të gjykohet përsëri.
Presidenti serb Boris Tadiq tha se ky është një lajm i mirë për drejtësinë dhe i keq për ata që kanë bërë krime në Kosovë. I kënaqur mbeti edhe Kryeministri serb Mirko Cvetkoviq. “Më vjen mirë që Gjykata po sillet në një raport me faktet. Lirimi i Haradinajt atëbotë nuk u bë për arsye u shpall i pafajshëm, por u bë për shkak se nuk kishte dëshmi të bollshme”, ka thënë Mirko Cvetkoviq, Kryeministër i Serbisë. E prokurori për Krime Luftë në Serbi Bruno Vekariq, këtë akt, që e quajti sukses, ia veshi kolegut të tij nga kryeqyteti holandez, Serzh Bramerc. Prokurori për krime lufte në Serbi Bruno Vekariq theksoi: “Ky është një hap i madh para drejtësisë për të gjithë viktimat në Kosovë, në atë periudhë të keqe. Është edhe një hap i mirë për zbutjen e tensioneve dhe rikonsulimit, sepse të gjithë kanë ndjenjën se u është bërë një padrejtësi e madhe”
Si Vekariq mendojnë shumë qytetarë. Ata thonë se Haradinaj duhet të gjykohet. “Është shumë e natyrshme sepse ka kryer krime”, thotë një banor serb. Në këto raste nuk mungojnë skeptikët. “Unë mendoj se e gjithë kjo është e planifikuar. Rezultati i tillë dihet më parë”, ka shtuar një qytetar në Serbi. Vendimi që ish kryeministri kosovar të rigjykohet, u mor vetëm një ditë para se Gjykata Ndërkombëtare e Drejtësisë të shpallë mendimin për pavarësinë e Kosovës.
 

< Paraprake		Pasuese >