Një polic i Kosovës vrau pasditen e së martës, rreth orës 17.00 një person. Ngjarja ka ndodhur në vendin e quajtur te antena në parkun e Gërmisë në Prishtinë. Në një njoftim të policisë thuhet se gjatë procesit hetimor është zbuluar identiteti i personit të maskuar. Ai është B.S i moshës 35 vjeçare nga Fushë Kosova. Trupi i pajetë është dërguar për autopsi në Institutin e Mjekësisë ligjore në Prishtinë. Sipas policisë, rasti ndodhi kur polici, identiteti i të cilit nuk u bë publik, kishte shkuar në rroba civile dhe me makinë private në Germi. Aty, polici u ndal nga një person i maskuar dhe i armatosur, i cili i kërkoi të hollat dhe telefonin. Sipas policisë, përveç kësaj, efektivi i tyre është sulmuar fizikisht nga i maskuari dhe i janë shkaktuar plagë. Më pas personi i armatosur ka dashur të largohet, por në ndërkohë zyrtari policor i ka kërkuar të ndalohet dhe të zbatojë urdhrat policore. Një gjë të tillë sipas policisë nuk e ka bërë i maskuari dhe polici ka shkrepur armën e tij zyrtare duke e lënë të vdekur. Ekzaminimi i vendit të ngjarjes për vrasjen e djeshme në Gërmi nga njësitet hetuese të Policisë së Kosovës, kanë vazhduar deri rreth orës 11.00 të ditës së mërkurë. Bëhet e ditur se me urdhër të Prokurorit të Qarkut, zyrtarit policor i është caktuar masa e ndalimit policor si vazhdimësi e procedurave të rregullta hetimore.



 

< Paraprake		Pasuese >