Organizata e Veteranëve të Luftës së UÇK-së, e ka kundërshtuar ashpër deklaratën e fundit të zv.shefit të EULEX-it, Roj Riv, i cili tha se ky mision nuk do të dërgojë njësitë speciale në veri të Kosovës.

Përmes një reagimi OVL e UÇK-së ka vlerësuar se kjo deklaratë është nga më tendenciozet dhe më të dëmshmet që janë dëgjuar ndonjëherë nga ky mekanizëm ndërkombëtar.

“Deklarimi i hapur që njësitet e EULEX-it nuk do të dërgohen në veri të Kosovës, tregon se EULEX nuk është serioz dhe po e legjitimon një ndarje të heshtur të veriut, duke e kundërshtuar direkt integritetin e shtetit të pavarur dhe sovran të Kosovës dhe duke legalizuar strukturat ilegale të Serbisë”, thuhet në reagimin e shoqatave të luftës.

Më tej, OVL e UÇK-së thekson se nëse EULEX vazhdon të ndjek këtë politikë të dyfytyrësisë, të dëmtimit të shtetit sovran për të cilin kanë derdhur gjak me mijëra bashkëluftëtarë, atëherë do të shqyrtojnë mundësitë e veprimit konform situatës së krijuar.
 

< Paraprake		Pasuese >