Autoritetet në Beograd presin që qëndrimi i Gjykatës Ndërkombëtare të Drejtësisë të jetë në favor të tyre.

Kryeministri serb Mirko Cvetkoviq, në një intervistë për AFP-në, tha se Serbia pret që opinioni i GJND-së të jetë se shpallja e pavarësisë së Kosovës ka qenë ilegale.

Pas kësaj ai pret që të pasoi edhe fillimi i bisedimeve të reja, pasi që, sipas Cvetkociqit, vetëm me dialog mund të tejkalohet situata e tashme e rëndë në Kosovë.

Ndërkohë ekspertja për Ballkanin Perëndimor, Xhudi Bat në një artikull të saj për fondin e marrëdhënieve ndërkombëtare dhe dialogut të politikës së Jashtme, FRIDE, ka vlerësuar  se mendimi i GJND-së nuk do të mund t'a zgjidhë qartë çështjen politike të pavarësisë së Kosovës dhe do të ketë efekt praktik mjaftë të vogël në statusin e shtetit të ri.

Sipas saj, ekzistimi i shteteve është fakt, e jo çështje e drejtësisë, dhe e drejta ndërkombëtare ka shumë pak për të thënë për mënyrën se si krijohen shtetet. “Shteti i Kosovës pa dyshim se ekziston si fakt, qoftë edhe nëse shpallja e pavarësisë, sipas gjykatës, mund të ketë qenë e paligjshme”, ka thënë Bat.

Në këtë artikull, ekspertja shpreh bindjen se qoftë edhe nëse mendimi i GJND-së është negativ, Kosova do të pranojë edhe një valë të re njohjesh.

Gjykata Ndërkombëtare e Drejtësisë, zyrtarisht njoftoi se më 22 korrik do të japë mendimin e vet këshillëdhënës lidhur me shpalljen e pavarësisë së Kosovës, të cilin e ka kërkuar Asambleja e Përgjithshme e Kombeve të Bashkuara, me nismën e Serbisë.
 

< Paraprake		Pasuese >