Kryeministri Hashim Thaçi ka iniciuar në mbledhjen e rregullt të Qeverisë nxjerrjen e Ligjit anti-mafia, me qëllim të parandalimit të krimit të organizuar dhe trafikimit të pasurisë.

Thaçi ka shtuar që hartimi i këtij projektligji të bëhet në kuadër të angazhimeve të Qeverisë për implementimin e plotë të kritereve demokratike si parakusht për integrim në Bashkimin Evropian dhe për të përmbushur të gjitha sfidat që dalin në raport me angazhimet e Qeverisë për raportin e progresit që pritet të dalë në vjeshtë.

“Ky ligj do të përcaktojë procedurat, kompetencat dhe kriteret për zbatimin e masave parandaluese kundër personave që janë subjekt i këtij ligji, si të dyshuar për pjesëmarrje në krimin e organizuar dhe trafikim. Pastaj qëllimi i këtij ligji do të jetë parandalimi dhe goditja e krimit të organizuar dhe trafikimit përmes konfiskimit të pasurisë së personave të cilët kanë një nivel të pajustifikuar ekonomik si rezultat i veprimtarisë së dyshuar kriminale”, ka thënë Thaçi.

Sipas kryeministrit Thaçi, ky ligj do të punohet nga ekspertë vendore dhe në harmoni të plotë me standardet e vendeve të Bashkimit Evropian dhe në konsultim me ekspertë të Komisionit Evropian.

Ky reagim i Thaçit ka ardhur pas informatës së ministrit të Shëndetësisë, Bujar Bukoshi, i cili veç tjerash ka bërë thirrje që të paguhen tatimet.

“Po e marr me mend se edhe në media është bërë me dije se këshilltari Ilir Tolaj është arrestuar. Këtë informatë e kam marrë zyrtarisht nga prokuroria e EULEX-it. Desha t’iu informoj dhe t’i thërras kolegët e tjerë që të paguani tatimet”, ka thënë Bukoshi.

Zyrtarët e Qeverisë nuk kanë dashur të komentojnë arrestimin e Tolajt, por kanë thënë se kjo është çështje e drejtësisë dhe se qëndrimi i Qeverisë së Kosovës është që në asnjë mënyrë politika të mos përfshihet në punën e drejtësisë.
 

< Paraprake		Pasuese >