Kuvendi i Kosovës miratoi të hënën në parim Projektligjin për ndryshimin dhe plotësimin e buxhetit. Pro këtij vendimi votuan 65 nga 85 deputet sa ishin të pranishëm në sallë.
Votimi erdhi pas shumë kritikave të opozitës, sipas të cilës, qeveria po diskriminon qytetarë e vendit, duke drejtuar investimet vetëm në komunat ku qeverisë PDK-ja.
Por kryeministri Hashim Thaci, që doli në foltore tha se mirëpret gjithë kritikat e sugjerimet, dhe u bëri thirrje deputetëve që ta votojnë projektligjin. Ky projektligj mori edhe mbështetjen e LDK-së, e cila kishte kushtëzuar votën e saj në rast se nuk procedohet në Kuvend Projektligji për Prishtinën. Ky i fundit tashmë ka hyrë në procedurë parlamentare dhe sipas shefit të Grupit Parlamentar të LDK-së, Ismet Beqiri, ky projektligj mund të miratohet në parim para pushimeve të verës, ndërkaq do të shqyrtohet për herë të dytë në fillim të sesionit të ardhshëm vjeshtor.

< Paraprake		Pasuese >