Një person ka humbur jetën në incidentin e ndodhur në mëngjesin e së premtes në Mitrovicë. Policia e Kosovës ka konfirmuar lajmin ndërsa Agjencia serbe e lajmeve Tanjug bën të ditur se personi i vdekur është mjeku i spitalit në veri të Mitrovicës, Mesud Xhekoviq.
Ndërkohë rreth 10 persona thuhet të jetën lënduar në shpërthimin që ndodhi në lagjen e Boshnjakëve derisa mediet serbe flasin për një shifër deri në 12 të lënduar.
Incidenti ndodhi pasi qindra serbë u mblodhën që në mëngjes për të kundërshtuar hapjen e Zyrës së regjistrimit civil të Qeverisë së Kosovës, në këtë lagje shumetnike në pjesën veriore. Pas shpërthimit, që besohet të ketë goditur disa protestues, janë dëgjuar edhe të shtëna. Në zyrën e hapur u pozicionuan forca të policisë kosovare, të EULEX-it si dhe trupa të KFOR-it. Ministri i Punëve të Brendshme Bajram Rexhepi ka konfirmuar rastin. Ai ka thënë se puna e zyrës do të vazhdojë pavarësisht cdo lloj presioni. Të plagosurit sipas ministrit janë 5 serbë dhe 1 boshnjak ndërkohë ka shtuar se shpërthimi nuk ka ndodhur afër zyrës që ka hapur qeveria por nga pakujdesia që kanë pasur të plagosurit derisa po mbanin municion. Ndërkohë edhe Presidenti i Kosovës, Fatmir Sejdiu, ka dënuar shpërthimin e së premtes në “Lagjen e Boshnjakëve” në Mitrovicë. Ai ka thënë se dhuna cenon interesat e të gjithë qytetarëve të Kosovës. Presidenti Sejdiu kërkon nga institucionet përgjegjëse, vendase dhe ndërkombëtare, që urgjentisht ta ndriçojnë këtë akt, kurse fajtorët t’i nxjerrin përpara drejtësisë.
Sipas një kumtese të Ministrisë së Administrimit të Pushtetit Lokal, që e hapi këtë zyrë në bashkëpunim me ministrinë e brendshme, qëllimi i saj është lëshimi i dokumenteve për qytetarët e interesuar, ndërsa do të jetë hapi i parë praktik i qeverisë së Kosovës në integrimin e asaj pjese të vendit.

< Paraprake		Pasuese >