Konsolidimi i institucioneve shtetërore të Kosovës ka thelluar ndarjet përgjatë lumit Ibër, duke bërë që territori i dominuar nga serbët në veri të vazhdojë të refuzojë çdo bashkëpunim direkt me autoritetet në Prishtinë.

Kështu thotë raporti i fundit i Freedom House, i cili thekson se sfidë tjetër është edhe koalicioni qeverisës i Kosovës që mund të pësojë kolaps, gjë që do të mund të çojë në mbajtjen e zgjedhjeve të reja qendrore gjatë kësaj vjeshte.

Ndërkohë, serbët në pjesët tjera të vendit kanë bashkëpunuar me qeverinë qëndrore dhe kanë filluar gradualisht të integrohen me pjesën tjetër të shtetit. Ndërkohë që nga të arriturat më të mira të Kosovës për vitin e kaluar thuhet të jetë decentralizimi.

E sfidë për Kosovën për këtë vit mbetet mendimi këshillëdhënës i GJND-së që mund të ndikojë drejtpërsëdrejti në njohjen e mëtejme të pavarësisë së Kosovës dhe në legjitimitetin e shtetit. Raporti po ashtu kritikon praninë ndërkombëtare në Kosovë që nuk e ka shfrytëzuar ndikimin që ka mbi autoritetet vendore për të eliminuar trendet negative në qeverisje.
 

< Paraprake		Pasuese >