Rreth 1.500 besimtarë ortodoks nga të gjitha viset e Kosovës dhe Serbia, u mblodhën sot në mëngjes në Graçanicë për të marrë pjesë në liturgjinë e mëngjesit për nder të ditës së Shën Vitit.

Vetë kreu i kishës Ortodokse Serbe, Patriarku Irinej ka udhëhequr lutjen e mëngjesit të ditës që në serbisht njihet si Vidovdan.

Forca të shumta të policisë së Kosovës, ishin angazhuar që të sigurojnë perimetrin e Manastirit të Graçanicës. Ndërsa në vendngjarje dalloheshin flamuj të shumtë serb.

Në turmën e njerëzve të mbledhur para objektit të kultit, kishte edhe të atillë që mbanin veshur simbole të organizatës çetnike Obraz dhe fotografinë e kryetarit të radikalëve Vojisllav Sheshel. Besimtarët pas liturgjisë, u transportuan me autobus për në Gazimestan, ku shwnuan 621 vjetorin e betejës së Kosovës.

Sipas Policisë së Kosovës, manifestimi në Gazimestan ka përfunduar në orët e para të pasdites. Zëdhënësi Baki Kelani ka thënë se tubimet janë përcjellë nga Policia e Kosovës, e cila, sipas tij, nuk ka shënuar ndonjë incident.
Për Vidovdan në Kosovë, po qëndron edhe ministri serb Goran Bogdanoviq.

Ai porositi se qëllimi i Beogradit në Kosovë, nuk është që të kërcënojë këdo, por që të kërkohet zgjidhja për një bashkëjetesë. Bogdanoviq, shtoi se qëllimi i politikës serbe është që të mbrojë atë që është e saj, dhe që t’i mundësojë ekzistencën e mëtejme të institucioneve të Serbisë në Kosovë.

Përveç këtij segmenti, Bogdanoviq tha se duhet ruajtur edhe funksionimin e mëtejmë të kishës Ortodokse serbe, e cila ruan një rol të madh në popull. Andaj, sipas tij, qeveria serbe do të bëjë përpjekje maksimale që të arrijë të ruaj unitetin mes shtetit, popullit e Kishës.

Kjo strategji, siç tha ai, paraqet një parakusht për ruajtjen e Kosovës si pjesë integrale të Serbisë.
 

< Paraprake		Pasuese >