Tre persona janë plagosur sot me armë zjarri brenda Kuvendit komunal të Skënderajt, ka bërë të ditur policia.

Ngjarja ka ndodhur rreth orës 9 të mëngjesit të sotëm, ndërsa dyshohet se incidenti është shkaktuar si pasojë e një konflikti pronësor.

Zëdhënësi Besim Hoti tha se tre të plagosurit janë nga fshati Polac i komunës së Skënderajt: Isuf Hoti, Adnan Koca dhe Fadil Xani.

"Në bazë të hetimeve preliminare të policisë në këtë rast, besohet se së paku dy persona të dyshuar, të armatosur, kanë shtënë drejt viktimave të tyre pas një përleshjeje fizike brenda ndërtesës së kuvendit komunal", thuhet në njoftimin e policisë.

Pas ndihmës së ofruar në Shtëpinë e Shëndetit të qytetit, janë transportuar në repartin e emergjencës në QKUK në Prishtinë.

Sipas mjekëve kujdestarë dy nga të plagosurit janë në gjendje të rëndë. Policia e Kosovës ka bërë bastisjen e dy lokacioneve, shtëpive private, në fshatin Klinë të Skenderajt, në kërkim të dyshuarve të këtij rasti.

< Paraprake		Pasuese >