(UPDATED)

Ministri i Shëndetësisë Bujar Bukoshi tha sot në mbledhjen e qeverisë se Drejtori i shëndetësisë Ali Sadrija ështe suspenduar nga pozita që ka pasi ndërkohë procedurat e shkarkimit janë duke vazhduar.

Bukoshi ka mohuar shkrimet në dia media të cilat kanë thënë se shkarkimi i Ali Sadriaj është bërë me kërkesën e kryeministrit Hashim Thaçi.

Ministri i Shëndetësisë tha se nuk i takon as atij, as kryeministrit por është sekretari permanent i shëndetësisë ai i cili bën shkarkimin e drejtorit të QKUK-së duke marrë parasysh besimet që janë bërë për të.

Ndërkohë gazeta "Express" shkruan se është ndaluar përkohësisht shkarkimi i drejtorit të QKUK-së Ali Sadriun. Sipas gazetës, kjo ka ndodhur për shkak se ka ndërhyrë Presidenti Fatmir Sejdiu, ndonëse ministri Bujar Bukoshi është i vendosur ta shkarkojë atë, pas zënkave që ai ka pasur me kreun e QKUK-së.

Gazeta shkruan se ligjërisht, shkarkimi i tij fillohet nga ministri i Shëndetësisë dhe nënshkruhet nga sekretari permanent. Por në këtë rast, edhe presidentit duket se i ka ardhur radha të përzihet, shkruan “Express”.

Burime të besueshme të gazetësExpressit, kanë sqaruar se presidenti i vendit, Fatmir Sejdiu, është personi i cili ka intervenuar që Ali Sadriu të mos shkarkohet.

E në këtë rast, ushtruesi i detyrës së sekretarit permanent në MSH, Haxhi Kamberi, nuk guxon as ta bëjë këtë. “Ali Sadriu ka qenë të martën në Ministrinë e Shëndetësisë dhe vendimin për shkarkimin e tij nuk e ka lëshuar ushtruesi i detyrës së sekretarit, për shkak se Ali Sadria është i përkëdhelur i kryetarit të Kosovës, Fatmir Sejdiu ”, tregon një zyrtar për Express, në kushte anonimiteti.

Pas një sherri mes Sadriut dhe ministrit Bukoshi në zyrën e këtij të fundit, burimi i gazetës shton se ata kanë pasur një konflikt mjaft të ashpër verbal, kur Ali Sadriu e ka kërcënuar ministrin se do të bëjë publike të gjitha të zezat që ka bërë Bukoshi prej kohës së 3-përqindëshit e deri më sot.

Burimi i ka thënë gazetës se ministri Bujar Bukoshi është i vendosur ta shkarkojë Ali Sadriun dhe se largimi i tij nga pozita e drejtorit ekzekutiv mund të bëhet brenda dy ditësh. Derisa konfliktet dhe zënkat vazhdojnë, problemet në QKU vetëm sa vazhdojnë të rriten.

< Paraprake		Pasuese >