(UPDATED)

Ai ishte serbi më i madh në mesin e shqiptarëve, dhe shqiptari më i madh në mesin e serbëve. Kështu u tha sot në komemoracionin që u mbajt në Beograd, në teatrin e dramës jugosllave.

Kritiku i filmit Milan Vlajqiq, tha me këtë rast se Bekimi ka qenë njeri me aftësi të madhe dhe fascinuese të aktrimit, e po ashtu edhe njeri i integritetit të madh moral.

Drejtori i kinotekës jugosllave, Radoslav Zelenoviq ka pohuar se në shtator do të mbahet retrospektiva e filmave të Fehmiut.

Pos gruas Branka Petriq dhe djalit Uliksit, në komemoracion ishin të pranishëm edhe një numër i fytyrave publike, si dhe ministri serb i kulturës, Nebojsha Bradiq.

Në anën tjetër në Kosovë, Orkestra dhe korri i Fakultetit të Arteve ka performuar veprën “Rekuiem” të Moxartit në shënimin e shtatë ditëve të humbjes së aktorit Bekim Fehmiu.

Kjo ngjarje është financuar nga Ministria e Kulturës.
Në fillim është mbajtur një minutë heshtje ndërsa koncertit i kanë munguar duartrokitjet.

Dirigjent ishte Bujar Berisha, ndërsa kjo është ngjarja që shënon fundin e shtatë ditë zie që kanë mbajtur institucionet e kulturës në Kosovë.

Ministri Lutfi Haziri ka paralajmëruar se Presidenti Fatmir Sejdiu do t’i japë medaljen “Artist i Merituar” Bekim Fehmiut gjatë këtyre ditëve.

 

< Paraprake		Pasuese >