Organizata joqeveritare, Demokracia në Veprim, i ka publikuar sot rezultatet preliminare për zgjedhjet lokale në komunën e re të Parteshit.

Sipas këtyre rezultateve, për postin e kryetarit të komunës udhëheq Nenad Cvetkoviq me 47, 4 %, pastaj Todor Mirkoviq me 25,5 %, në vend të tretë është Vesna Jovanoviq me 23,0 %, ndërsa 4,2 % të votave thuhet se i ka marrë Goran Millosheviq.

Ndërkohë sipas rezultateve preliminare për Kuvendin Komunal të Parteshit, Demokracia në Veprim e ka radhitur partinë "Zaviçaj" me 40,0 % në vendin e parë, JSL thuhet se ka fituar 20% të votave, pastaj Narodna me 17,7 %, e pasuar nga Gizzo me 16,7 % dhe SSSD ja me 5,6 %.

Nëse konfirmohet ky rezultat, atëherë pritet të ketë edhe një raund tjetër të zgjedhjeve për balotazh.

KQZ për zgjedhjet:

Zyrtarë të Komisionit Qendror Zgjedhor kanë thënë se pjesëmarrja e votuesve në zgjedhjet në komunën e re të Parteshit ka qenë në nivel të kënaqshëm, ndërsa i gjithë procesi ka rrjedhë i qetë dhe pa incidente. Fehmi Ajvazi, zëdhënës i KQZ-së, ka konfirmuar se të gjitha vendvotimet janë mbyllur me kohë.

Sipas të dhënave nga KKZ-ja, në zgjedhjet për kryetar të Parteshit dhe këshilltarë të asamblesë komunale kanë votuar 2.292 votues ose 65.3 për qind nga gjithsej 3.508 qytetarë me të drejtë vote. I gjithë procesi ka rrjedh mirë dhe pa incidente. Komuna e re e Parteshit, do të përbëhet prej fshatrave të deritashme të Gjilanit, Partesh, Budrikë dhe Pasjan, të cilat llogaritet t`i kenë diku rreth 5 mijë banorë.

 

< Paraprake		Pasuese >