Mbi 100 zyrtarë policorë të njësiteve të ndryshme të policisë së Shqipërisë dhe Kosovës, por edhe të FSK-së, kanë realizuar të hënën një operacion të përbashkët të kërkim-shpëtimit për 6 vjeçarën Bleona Mata nga Zapodi i Kukësit.

Kosovapress njofton se pas kërkimeve që janë bërë në zonën e Kukësit, në afërsi të zonës kufitare me Republikën e Kosovës është zhvilluar edhe një operacion kërkimi edhe në Kosovë.

Forca policore nga Shqipërisë nga Drejtoria e Qarkut në Kukës dhe Policia e Kosovës, të mbështetura edhe nga FSK, kanë kërkuar në një rrethinë malore prej më shumë se 10 kilometra katrorë në afërsi të fshatit Krstec - komuna e Dragashit.

“Pas një takimi paraprak në mes zyrtarëve policor të Kosovës dhe Shqipërisë, filloi operacioni i kërkimit nga ora 10.00 deri në 17.00 për gjatjen e 6 vjeçarës Bleona Mata, të raportuar si person i humbur që nga fundi i muajit maj të këtij viti në Zapod të Kukësit”, ka njoftuar Policia e Kosovës.

Bëhet e ditur se edhe pse kërkimi ishte shtrirë në një zonë të gjerë malore, zyrtarët që morën pjesë në këtë operacion nuk arritën të gjenin ndonjë gjurmë të 6 vjeçarës Mata.

Policia e Shqipërisë ka vënë në dispozicion edhe një shpërblim në të holla për të gjithë ata që kanë ndonjë informacion që mund të shpjer deri te gjetja e kësaj vajze.

Edhe Policia e Kosovës bënë apel te të gjithë qytetarët e rrethit të Prizrenit dhe më gjerë që nëse kanë ndonjë informacion për Bleonën të kontaktohet stacioni më i afërt policor.

< Paraprake		Pasuese >